Siku saba za urais ndani ya CCM

Dar/Dodoma. Ni wiki ngumu kwa Chama cha Mapinduzi (CCM). Ndivyo unavyoweza kusema kwani chama hicho kinachotawala kitafanya vikao vyake vya juu vitakavyohitimishwa kwa kumpata mgombea wake wa urais.

Mchakamchaka utaanza na kikao cha Kamati ya Maadili keshokutwa kukutana. Tayari CCM imetangaza kuwa itatumia vigezo 13 ilivyojiwekea kuwachambua wagombea 38 waliochukua na kurejesha fomu ili kupata majina ya wachache watakaopigiwa kura na mkutano wake mkuu.

Awali, kulikuwa na watangazania 42 waliochukua fomu za kuomba kuteuliwa na CCM, lakini wanne kati yao hawakurejesha fomu. Kamati Kuu itakayokutana Alhamisi itakuwa na kazi ya kuwachuja hadi kubakia wasiozidi matano yatakayopigiwa kura Ijumaa ijayo katika Kikao cha Halmashauri Kuu ya Taifa (NEC) na kubaki matatu.

Katibu wa Baraza la Ushauri wa Wazee wa CCM, Pius Msekwa juzi alilieleza gazeti hili kuwa mbali na sifa hizo, suala jingine litakalotizamwa ni iwapo wagombea hao walikiuka kanuni na taratibu za uchaguzi wakati wote wa mchakato.

Majina matatu yatakayopitishwa katika kikao cha NEC ndiyo yatapigiwa kura na Mkutano Mkuu wa Taifa wa CCM utakaokaa Julai 11 na 12 na kupata mwakilishi mmoja wa CCM katika Uchaguzi Mkuu wa Oktoba 25.

Uzoefu unaonyesha kuwa chama hicho huzingatia mambo mengi katika kufanya uteuzi, ikiwa ni pamoja na kutafuta mtu atakayeondoa makundi yaliyoundwa wakati wa uteuzi wa mgombea urais.

Baadhi ya mambo yanayotajwa kuwa yatakuwa karata muhimu katika mchujo huo ni suala la Muungano, jinsia, eneo la kijiografia, rekodi ya mtia nia na kukubalika kwa kada hasa katika kipindi hiki ambacho upinzani umeimarika. Hofu inayoonekana kukikumba chama hicho ni ya kumpata mgombea mwenye sifa na anayekubalika na atakayeweza kukabiliana vyema na yule atakayesimamishwa na Umoja wa Katiba ya Wananchi (Ukawa) unaoundwa na vyama vya NCCR-Mageuzi, Chadema, CUF na NLD.

Kauli iliyotolewa na Mwenyekiti wa chama hicho, Rais Jakaya Kikwete kwamba hana mgombea anayemuunga mkono kinaonyesha jinsi mchujo huo utakavyokuwa mgumu.

Kauli ya Takukuru

Kutokana na unyeti wa wiki hii, Mkurugenzi Mkuu wa Taasisi ya Kupambana na Kuzuia Rushwa (Takukuru), Dk Edward Hoseah amesema vijana wake wako Dodoma na kuwatahadharisha wagombea wote kuzingatia sheria.

“Nawashauri wagombea wote wazingatie Sheria ya Gharama za Uchaguzi na Sheria ya Kupambana na Rushwa, wafanye mambo kistaarabu na ambaye atakwenda kinyume, sheria itachukua mkondo wake,” alisema.

Kamanda wa Polisi wa Mkoa wa Dodoma, David Misime alisema jeshi hilo limejiandaa vizuri kwa ugeni huo mkubwa.

“Natoa onyo kwa mtu yeyote mwenye nia ovu au kutaka kufanya kitendo chochote cha kuhatarisha usalama, atashughulikiwa kwa nguvu zote za kisheria,” alisema Misime.

Aliwataka wajumbe wa vikao hivyo, wageni na wananchi kutambua kuwa usalama unaanza kwa kila mmoja wao, hivyo wakiona jambo lolote linaloashiria uhalifu au si la kawaida, watoe taarifa kwa vyombo vya ulinzi na usalama.

Wasiwasi wa kukosa vyumba

Huku zikiwapo taarifa za hoteli zote kujaa mapema, mmoja wa wagombea Boniface Ndengo, alisema,

“Mimi nataka niwepo huko (Dodoma) kuanzia Jumanne jioni, nitajaribu kufanya mpango wa chumba lakini nimesikia vyumba vimejaa, sijui kama nitapata nafasi,” alisema.

Alisema hataki kubeba watu wengi, bali ataongozana na watu wasiozidi watatu na amepata habari kuwa wagombea wote wataalikwa kwenye mkutano mkuu.

Taarifa zilisema kuwa CCM imechukua hoteli zaidi ya 300 na hakuna wajumbe watakaochangia chumba kwa kulala wawili kama ilivyokuwa miaka ya nyuma.

Kauli ya wasomi

Akizungumzia hatua hiyo, Mhadhiri wa Idara ya Sayansi ya Siasa wa Chuo Kikuu cha Dar es Salaam (UDSM), Richard Mbunda alisema katika uteuzi huo, ni vyema CCM ikamteua mwanachama anayekubalika na ambaye atamudu hali ya upinzani iliyopo sasa.

“Upinzani wa sasa siyo sawa na wa miaka mitano uliopita, wateue mtu atakayepata kura za pande zote kwa maana ya kura ndani ya chama na nje ya chama,” alisema Mbunda.

Alitolea mfano wa kile kilichotokea nchini Kenya wakati wa Kanu wakati chama hicho kiliposhinikiza mgombea fulani apitishwe wakati hakuwa anakubalika.

“Wasishinikize mtu fulani apite. Lazima wazingatie hayo ili kusije tokea mpasuko,” alisema na kuongeza kuwa binadamu wapenda hisia zao zizingatiwe.

Aliyekuwa Makamu Mkuu wa Chuo Kikuu Huria (OUT), Profesa Tolly Mbwete alisema CCM haikuwa na utaratibu mzuri tangu mchakato wa kuchukua fomu za kuwania urais ulipoanza.

“CCM lazima iwe na utaratibu mzuri wa kumchagua mtu au watu wachache watakaowania nafasi hiyo. Sasa tumeona kila mtu tu anajitokeza kuchukua fomu ya kuwania urais. Huo siyo utaratibu mzuri,” alisema Profesa Mbwete.

Alisema kutokana na hilo, inakuwa vigumu hata kutoa maoni juu mchakato wake wa kumteua mgombea urais.

Imeandikwa na Noor Shija na Sauwa (Dodoma), Fidelis Butahe na Suzan Mwillo (Dar).

source: mwananchi

UJUMBE WA PASAKA 2015: AMANI YETU ITALINDWAJE TUNAVYOELEKEA KATIKA UCHAGUZI WA TAIFA LETU 2015?

"Sauti ya mtu imesikika jangwani: `Mtayarishieni Bwana njia yake; nyosheni mapito yake.  Kila bonde litafukiwa, kila mlima na kilima vitasawazishwa; palipopindika patanyooshwa, njia mbaya zitatengenezwa.  Na, watu wote watauona wokovu utokao kwa Mungu."`

 "Enyi kizazi cha nyoka! Ni nani aliyewadokezea kwamba mngeweza kuiepuka ghadhabu inayokuja?  Basi, onyesheni kwa matendo kwamba mmetubu”.

Umati wa watu ukamwuliza, “Tufanye nini basi? Akawajibu, Aliye na nguo mbili amgawie yule asiye na nguo; aliye na chakula afanye vivyo hivyo. Nao watoza ushuru wakaja pia ili wabatizwe, wakamwuliza, Mwalimu, tufanye nini?  Naye akawaambia, Msitoze ushuru zaidi ya kima kilichowekwa.  Nao askari wakamwuliza, "Na sisi tufanye nini?  Naye akawajibu, Msichukue vitu vya mtu yeyote kwa nguvu wala kumshtaki yeyote kwa uongo. Toshekeni na mishahara yenu."

Leo tunavyosherekea siku hii ya Pasaka ujumbe mzito kwa viongozi wa serikali, vyama vya siasa na viongozi wa dini tudumishieni amani yetu; na hii itawezekana kwa kutekeleza kauli ya Yohana Mbatizaji  “Toshekeni na masilahi” na kwa viongozi wa dini “Hubirini ukweli na muwe wa kweli; hivi vikitekelezwa vitalijengeeni Taifa letu Amani ya kweli”:

Neno  hili ni zito japo lilizungumzwa kipindi kirefu nyuma lakini tunaendelea kulishuhudia leo tunapowaangalia watendaji wetu katika serikali zetu, ndani ya vyama vya siasa na sasa hata miongoni mwa viongozi wa dini ambao nao wameanza kupenyeza masilahi yao binafsi, na kuanza kuzoofisha amani ya Taifa letu.

Neno hili linatufundisha uadilifu, uwajibikaji kulingana na maadali  na kanuni za kazi ambazo zinatulazimu sisi kama watendaji wa Taifa kuweka mbele matakwa ya Taifa na sio masihahi binafsi;

Najiuliza tena  leo hii hata viongozi wa dini mbona wamekuwa mbele katika kutanguliza masilahi binafsi mbele kuliko mwongozo wa Vitabu vikatifu kwa katika kujenga amani; Je wanafanya hivyo kwa kivuli cha nani? Na  hili linamaana gani kwa taifa letu? 

wananchi wa Taifa hili wanahitajii uhuru wa kiuchumi ambao unatokana na viongozi wetu watangulize mbele masilahi ya Taifa, warizike kidogo wananchokipata; kinyume chake kama hawatarizika na hicho kidogo hawataweza  kuweka mbele masilahi ya taifa na bali watatanguliza mbele vitendo vya  rushwa na ufisadi ambao unarudisha maendeleo ya Taifa nyuma sana na kudhoofisha amani yetu.

Ujumbe wa  Pasaka ya mwaka 2015  itukumbushe sisi  Kama Taifa na kama Raia na watendaji ambao tumekula kiapo cha utii na maadili bora ya uwajibikaji kwa Taifa letu kuwapa wananchi wanyonge zawadi kubwa ya  uhuru  wa kiuchumi,  ili kila mmoja wetu aweze kuyafurahia  zawadi pekee ya rasilimali  ambayo Mungu amelijalia Taifa letu. Hakuna atayepingana nami kuwa  nchi yetu imefurika kwa  asali na maziwa tatizo ni wachache tu ambao wanafaidi kwa kutoridhika na mishahara yao. 

kwa kipindi kirefu tumeona kuwa nchi yetu  Tanzania iliyokuwa ikifurika neema  ya rasilimali sasa imegeuka; kuwa nchi inayofurika machungu; matendo yaleyale ya kifisadi, ya ukandamizaji, ya unyanyasaji ambao  Farao aliwatendea wana wa Israeli huko misri miaka hiyo; lakini kwa kuangalia falsafa hiyo ya matendo ya Farao ndio tunaishuhudia sasa namna watendaji wetu walikokabidhiwa dhamana ndani ya Taifa letu  ambao sio waadilifu wananyo haribu nchi, na kuacha machingu kwa wananchi ambao bado wako kwenye dimbwi la umasikini.

je viongozi wetu wa dini leo hii wanahubiri amani ambayo Yohane Mbatizaji aliifafafanua kulingana na makundi yaliyokusanyika?

Je viongozi wa dini wanahubiri amani au wanaendeleza chuki moingoni mwa wananchi wa Taifa letu?

Kulingana na Yohane matajiri wanaotakiwa kuangalia haki ya maskini, "Aliye na nguo mbili amgawie yule asiye na nguo; aliye na chakula afanye vivyo hivyo."(Lk 3,11), kwa watoza ushuru waepuke rushwa na matendo ya kifisadi "Msitoze ushuru zaidi ya kima kilichowekwa."(Lk 3,13) na kwa maaskari wazingatie haki "Msichukue vitu vya mtu yeyote kwa nguvu wala kumshtaki yeyote kwa uongo. Toshekeni na mishahara yenu."(Lk 3,14).

Leo hii ndani ya Taifa vitendo hivi vimeshamiri tena kwa kiasi kikubwa; na pengine kila mmoja ameshiriki kwa namna moja au nyingine katika uovu huu. Hii inaweza kuwa moja kwa moja au kwa kutokuwajibika ipasavyo katika eneo lake la kazi na hivyo kusababisha mianya katika kukua kwa matendo haya maovu. Wito wakati tunasherekea Pasaka 2015 sisi kama Taifa inatupasa tubadilike na kuhakikisha haki na upendo vinashamiri katika jamii yetu.

Kama tutafanikiwa kuishi kwa ujumbe huu wa Yohani Mbatizaji kuwa tutosheke ni mishahara yetu mimi naamini kuwa tukiweka mbele maslahi ya nchi, nchi itasonga mbele. TUKUMBUKE KAULI YA YOHANA MBATIZAJI KWA WALE ASKARI kuhusu dhuluma: TOSHEKENI NA MISHAHARA YENU, watu wana madaraka makubwa mishahara mikubwa na masurufu manono lakini bado wanaiibia nchi. Kwa nini lakini? Hii choyo ulafi kwa nini?

Nafikiri Tatizo la wanasiasa na Viongozi wa dini wakishafanikiwa kujikwamua kimasilahi wanasahau kuwa wananchi bado ni masikini na wanahitaji masaada ili nao waweze kufarahia zawadi ya maisha ambayo wamezawadiwa na Mwenyezi Mungu.

Amani kwao sio wimbo ulio bora tena kwao, maisha bora ya wananchi wao inabaki katika slogan tu.

Wanatumia muda mwingi kutukanana na kuonyeshana ufahari wao, ambao wamepata kwa kuendelea kuwakamua hawa wanachi masikini.

Je watendaji wetu wako tayari kutoa hesabu za utendaji wao siku watakapotakiwa na Mwenyezi Mungu tukiamini kuwa kazi zote hutoka kwa Mungu?

Nafiki Pasaka hii kujifunze kitu kingine kipya kuwa “Jihadharini na tabia ya kupenda fedha, na “toshekeni na mlivyonavyo” kwa sababu Mungu mwenyewe alisema,

“Kwa vyo vyote sitakupungukia kabisa, wala sitakutelekeza na kukuacha bila msaada. Kamwe, kamwe, sitakuacha hata kwa kiwango kidogo, kukuacha bila msaada, au kukuacha, au kukuangusha, au kulegeza mkono wangu kwako. Hakika sitafanya hivyo! Kwahiyo tunafarijika na kutiwa moyo, na kwa uhakika na ujasiri twathubutu kusema, ‘Bwana ndiye anisaidiaye” (Ebr 13:5, 6)

Kwa kutosheka na mishahara yetu na kwa kuamini kuwa sisi ni wachache ambao tumechaguliwa na Mwenyezi Mungu kuwa saidia wengine ili waweze kupata ridhiki zao; au kufurahia asali na maziwa kwa vipaji vyetu kwa kutimiza wajibu wetu tutakuwa tunatekeleza ujumbe huu wa “Utafuteni kwanza ufalme wa Mungu na haki yake na hivi vitu vingine vyote mtapewa kwa maelefu.

Tukitenda kila kitu kwa haki kamwe hatutakosa chochote unachohitaji kitakuwa ziada. Mwenyezi Mungu atakupa namna ya kupata kila uchokihitaji zaidi.

Imani yangu ni kama ile ya Paulo kama tutatosheka ni mishahara yetu,na kuwajali wanyonge katika Kupata Riziki
zao, “Na Mungu wangu atawajazeni na kila mnachokihitaji kwa kadiri ya utajiri wake, katika utukufu wake …”. Lakini hili litawezekana kama viongozi wetu wa serikali, vyama vya siasa na wale wa dini watafanya kazi zao kulingana na na viapo vya kazi zao.

"Mungu hatakosa KUWAONGEZEA wale wote wanaoifanya kazi yake sawasawa na mapenzi yake" huu ndio ujumbe wa Pasaka 2015

Neno La Leo: Naye Yesu Akasema; " Simoni, Acha Kuvua Samaki.."

Ndugu Zangu,
Bwana Yesu alipotembelea mto Galilaya, aliwakuta wavuvi wakivua samaki, Simoni alikuwa ni miongoni mwa wavuvi hao. Yesu akasema; " Simoni, acha kuvua samaki,nifuate ukawe mvuvi wa watu.

Naam, watu wengi wanaangamia kwa kukosa uelewa. Kwa kutojitambua. Wanahitaji ukombozi wa kifikra. Na siku zote, haki uinua taifa, vivyo hivyo, dhulma huangamiza taifa. Na mahala pasipo na haki, basi, hapo hapatukuwa na amani.

Oneni, maovu yametamalaki katika dunia tunamoishi. Siku zote, kujipendelea ndilo shina la maovu.
Siku zote, hamu inakuwa ni jambo jema, endapo binadamu ataweza kuitawala hamu/tamaa yake.Wanadamu tusipoitawala hamu yetu, tukaanza kujipendelea, kuwasahau wengine, basi, hilo huwa ndio chimbuko la maovu.
 
Hupelekea kutoelewana baina ya wanandugu, na hata kwa marafiki walioshibana. Hupelekea vurugu na machafuko katika jamii. Tunazungumzia uwepo wa upendo, haki na usawa.

Dini za kweli hapa duniani zinazungumzia umuhimu wa upendo, haki na usawa katika jamii. Iwe ni Uislamu na Ukristo vivyo hivyo.
 
" Naapa kwa zama . Hakika binadamu wote wamo katika hasara isipokuwa wale walioamini na wakafanya matendo mema. Wakahusiana na haki na wakahusiana na subira" (Koran tukufu, Surat ASWR)
Biblia nayo inasema; kuwa Kaini alikuwa mtu wa kujipendelea mno, akamwua nduguye. Mfalme Saulo alijipendelea mno, akamdhulumu Daudi. Yuda alijipendelea mno, akakubali kumsaliti Yesu kwa Vipande Thelathini vya Fedha. Hatimaye, akamsaliti Yesu.
 
Na ufufuko wa Bwana Yesu utukumbushe jukumu letu la kupambana na maovu katika jamii. Utukumbushe jukumu la kusaidia kazi ya kuwakomboa kifikra wanadamu wenzetu.

Kama vile Bwana Yesu alivyomkumbusha Simoni kwa kumwambia; " Simoni, acha kuvua samaki. E nenda ukawe mvuvi wa watu.
Ni Neno la Leo.
Pasaka Njema.
 
Maggid,
Iringa.

source: mjengwa blog

Tukitafakari Ya Garissa, Hii Ndio Tanzania Tunayoitaka..

Ndugu zangu,

Kwenye moja ya picha za magazetini leo, kuna hii inayomwonyesha Makamu wa Pili wa Rais wa Zanzibar, Balozi Seif Iddi akimpa pole Waziri Mkuu, Mizengo Pinda katika mazishi ya baba mzazi wa mkewe, Marehemu Mzee Abdallah Rehani yaliyofanyika kwenye makaburi ya Segerea jijini Dar es salaam,Aprili4, 2015.
Kwa hakika, hii ndio Tanzania tunayoijua. Kwamba Watanzania ni ndugu na tumechanganyika. Hata hivyo, Wahenga walisema; " Kamba hukatikia pabovu.

Siku zote, uzoefu ni mwalimu mzuri sana. Mathalan, uzoefu unatufundisha, kuwa kuwasha moto ni jambo jepesi sana, lakini, kuuzima moto, yaweza kuwa ni kazi ngumu sana.

Ona, moto ulioanza kwenye nyumba moja ya nyasi kijijini, waweza kusambaa haraka na hata kuteketeza kijiji kizima. Na tangu utotoni tumetahadharishwa hatari ya kucheza na moto.
Naam, binadamu usicheze na moto, labda iwe kwenye mazingaombwe.

Jumapili hii ya leo ningependa sana tuyakumbuke maneno ya busara na hekima nyingi kutoka kwa Bi. Joy Mukanyange. Huyu alikuwa Balozi wa zamani wa Rwanda nchini Tanzania. Mama huyu aliyatamka maneno haya miaka 16 iliyopita, takribani miezi sita kabla ya kifo cha Baba wa Taifa. Bi. Joy Mukanyange ( Pichani juu) alikiona kile ambacho Watanzania hatukukiona. Ni kama vile alikuwa mtabiri, maana, alichokisema mama yule leo ndio tunaanza kukiona. Siku ile ya Aprili 6, 1999, katika iliyokuwa Kilimanjaro Hotel, Bi Joy Mukanyanga aliyatamka haya;

" Naogopa, kwani nimeanza kuona dalili zinazojengeka za mgawanyiko wa kidini nchini Tanzania na eneo lote la Maziwa Makuu, hali ambayo inaweza kusababisha maauji ya halaiki kama yale yaliyotokea nchini mwetu mwaka 1994." Alisema Balozi yule wa Rwanda kabla ya kuendelea kutoa ufafanuzi wa historia ya Rwanda na matukio yaliyosababisha mauaji yale ya Wanyarwanda ya wao kwa wao. Ndio, Bi Joy Mukanyange alikiona kile ambacho Watanzania hatukukiona.
Na tutafanya makosa makubwa, kama hata sasa, tutajifanya kuwa hatukioni kile ambacho Balozi Joy Mukanyange alikiona . Kwamba hatukioni pia kile kilichotokea westgate na garissa.

Watanzania tukubali sasa kuwa tumepatwa na bahati mbaya sana ya baadhi ya Watanzania wenzetu kuanza kupandikiza mbegu za chuki miongoni mwetu. Kuna wanaotaka tuanze kubaguana kwa misingi ya kidini. Tunayashuhudia yakifanywa na baadhi ya viongozi wa kidini, makanisani na misikitini. Ni hao, ambao sasa wameamua kuchanganya dini na siasa huku waumini wao wakiwa ni wafuasi wa vyama tofauti tofauti vya kisiasa.
Hili ni jambo la hatari sana.

Ni hulka ya mwanadamu, anapokuwa matatizoni kumtafuta kondoo wa kafara. Mtu mwingine wa kummyooshea kidole kwa matatizo yake. Hali duni ya uchumi wa nchi, hali duni za maisha na umasikini wa watu wetu isiwe chachu ya kuanzisha vurugu za kijamii kwa kuegemea kwenye mitazamo ya kidini.
Maana, taratibu tumeanza kuizoea misamiati ya sisi na wao. Mathalan, sisi Wakristo na wao Waislamu. Sisi Wachagga na wao Wazaramo. Tunasahau, kuwa katika nchi yetu hii hakuna Sisi na Wao, kuna SISI tu.Tutakapokumbwa na maafa ya kitaifa watakaoathirika ni SISI, hakutakuwapo na WAO.

Hatari kubwa ninayoiona ni tatizo la wengi wetu kuwa na ufahamu mdogo juu ya dunia tunayoishi sasa, kibaya zaidi, ufahamu mdogo wa historia yetu. Hivyo basi, kupelekea hali ya kutojitambua kama taifa. Ndio, uelewa wa historia ya jamii husika ni jambo muhimu sana. Kiumbe huwezi kuelewa ya leo, kesho na kesho kutwa kama huelewi ya jana. Kuielewa historia yako ni kuelewa ulipo na unakokwenda. Historia ni kama maji ya mto, kamwe haijirudii. Historia ni wakati, ni muda. Kihistoria jana ni sawa na zamani.

Karne nyingi zilizopita wahenga wetu walitafsiri muda kama mkusanyiko wa matukio ya zamani na sasa. Waliamini kuwa yaliyotokea zamani na yanayotokea sasa ndiyo yenye kusaidia kubashiri yatakayotea kesho, yataamua mustakabali wetu.
Dalili tunazoziona sasa za kupandikiza mbegu za chuki kwa misingi ya udini na maeneo tunakotoka si dalili njema. Haya yatatupelekea kwenye maafa. Tuliopata bahati ya kutumia kalamu zetu hatuna budi kuliweka hili hadharani.
Hii ni nchi yetu. Ni Nchi yetu sote. Katika ulimwengu tunamoishi kuna mamilioni ya watu ambao hawana nchi. Wahenga wetu walishiriki katika kuijenga nchi hii, wametutarajia sisi tuendelee kuijenga na kuilinda heshima na hadhi ya nchi yetu.

Mengine yanayofanyika sasa sio tu yanaitia doa nchi yetu, bali, yanaiaibisha nchi yetu. Hatukupata kufikiri, kuwa atatokea anayejiita kiongozi kwa kiimani, akasimama hadharani na kumtukana kiongozi mwingine wa kiimani. yanatokea sasa, na tusiyaone ni ya kawaida. Tuyakemee kwa nguvu zote.
Watanzania hatuna haja wala sababu za kubaguana kwa misingi ya ukabila, dini na rangi. Sisi wote ni Watanzania. Tuna historia ya kujivunia. Ni historia yetu wenyewe. Kinyume na baadhi yetu wanavyofikiri au wanavyotutaka tufikiri, historia yetu haikuanzia enzi za Mwarabu , Mjerumani au Mwingereza. Historia yetu haikuanzia enzi za TANU wala Afro Shiraz.

Na dini hizi za kimapokeo zinazotufanya sasa tufarakane zimekuja na kuzikuta dini zetu za asili, na bado tunazo. Na hakika, Afrika hatugombanii matambiko. Afrika kila ukoo una tambiko lake, hivyo basi, dini yake. Kamwe hutasikia Waafrika wanagombania matambiko. Hutasikia Waafrika wakigombana kwa tofauti za matambiko yao.
Na sisi ni Waafrika. Hii leo mahala ambapo unaweza kuwagawa Watanzania na hata kufanikiwa kuwafanya wachinjane ni kwenye kwenye tofauti zao za imani hizi za kimapokeo; Uislamu na Ukristo.

Naam; kamba hukatikia pabovu, wanasema wahenga.Tusikubali dini iwe ndiyo penye ubovu kwenye kamba inayotuunganisha Watanzania. Tusifike mahali tukagombana kutokana na tofauti za imani ama dini ambazo wala si za asili yetu. Imani au dini ambazo, kama ilivyo dini zetu za asili, nazo zinatutaka wanadamu tuishi kwa amani, upendo na maelewano.
 

Maggid Mjengwa,
Iringa

 

source: mjengwa blog

Mawaziri wajibikeni si kusubiri kutishwa

Katuni.

Katika mkutano wa Bunge unaoendelea mjini Dodoma mawaziri wameendelea kukamiwa na wabunge kutokana na utendaji wao ambao unatiliwa shaka.

 

Kikubwa ni malalamiko kuhusu wizara zao na kushindikana kutekelezwa kwa majukumu mbalimbali hali inayoathiri uwezo wa serikali katika kuwaletea wananchi maendeleo.

 

Kwa mfano, Waziri wa Maliasi na Utalii, Lazaro Nyalandu, alikamiwa vilivyo na wabunge akidaiwa kuzembea kutangaza katika gazeti la serikali tozo mpya ya hoteli za kitalii katika hifadhi za taifa, hivyo kusababisha serikali kukosa mapato ya Sh. bilioni 80. 

 

Taarifa ya utekelezaji wa shughuli za Kamati ya Bunge ya Ardhi, Maliasili na Mazingira kwa kipindi cha mwaka 2014, iliyowasilishwa bungeni ilisema kuwa Serikali kupitia Shirika la Hifadhi za Taifa (Tanapa), inapoteza Sh. bilioni mbili kila mwezi kupitia tozo mpya kwa mfumo wa ‘fixed rate’ badala ya mfumo wa zamani ‘Concession rate’ katika kipindi cha kuanzia Septemba mwaka jana mpaka hivi sasa.

 

Kamati hiyo pia ilisema Septemba 12, mwaka jana, Mahakama Kuu Kanda ya Arusha ilitoa hukumu ya kesi iliyofunguliwa na baadhi ya wamiliki wa hoteli zilizoko katika Hifadhi za Taifa dhidi ya Tanapa kupinga shirika hilo kuanza kutoza tozo mpya kwa mfumo wa fixed rate badala ya Concession rate.

 

Bunge pia lilielezwa kuwa hukumu hiyo iliagiza Wizara ya Maliasili na Utalii kutoa tangazo katika gazeti la serikali kuhusu kuanza kutumika kwa tozo mpya, lakini ni takriban miezi minne sasa tangu kutolewa kwa hukumu hiyo tangazo hilo halijatolewa.

 

Bunge pia lilielezwa kuwa ni kwa msingi huo Tanapa na Mamlaka ya Hifadhi ya Ngorongoro zinaendelea kupoteza mapato yanayofikia Sh. bilioni mbili kila mwezi, huku serikali ikilia kila siku haina fedha za kutimiza majukumu yake mbalimbali.

 

Ingawa hasara ya Sh. bilioni 80 ambayo serikali imepata inakokotolewa kuanzia mwaka 2011 kesi hiyo ilipofunguliwa hadi Septemba 2014, hata Kamati ya Bunge ilipoitaka Wizara ya Maliasili na Utalii iwe imeshatoa tangazo hilo hadi kufikia Januari 28, mwaka huu, bado imeendelea kuvuta miguu.

 

Mashambulizi mengine yalielekezwa kwa Waziri wa Ardhi, Nyumba na Maendeleo ya Makazi, William Lukuvi, kwamba alisaidia mwekezaji mmoja jijini Dar es salaam kupata kiwanja, lakini halipi kodi ya Sh. bilioni 3 kwa Manispaa ya Kinondoni. 

 

Ingawa kwa desturi mwaka wa uchaguzi wabunge huwa wakali zaidi dhidi ya serikali, na kwa kweli mawaziri wengi huwa majeruhi kama ambavyo ilishuhudiwa kwenye mkutano wa Bunge wa 17 na 18 mwaka jana mwishoni kuhusiana na kashfa ya Tegeta ESCROW, mawaziri wengi wamekuwa ni kikwazo kikubwa kwa serikali kutekeleza majukumu yake.

 

Tunajua ni jukumu la Bunge kikatiba kuisimamia serikali. Ni kweli pia kwamba Bunge likilala na serikali pia hulala, lakini utaratibu huu wa mawaziri kusubiri kukaliwa kooni na wabunge ndipo watekeleze majukumu yao hakika hauwezi kuiponja nchi.

 

Tunakumbuka jinsi sakata la Tokomeza lilivyoleta mtafaruku bungeni mwaka juzi, hatimaye likaondoka na mawaziri wanne; ndivyo pia ilivyokuwa mwaka 2012 juu ya taarifa ya Mdhibiti na Mkaguzi Mkuu wa Hesabu za Serikali (CAG) kwa mwaka wa fedha wa 2009/10 pamoja na kashfa nyingine ziliwafanya wabunge wawang’ang’anie mawaziri sita, lakini wakaondolewa watano.

 

Pamoja na siasa zote zinazoweza kuwa zinachangia ukali wa wabunge dhidi ya serikali au waziri mmoja mmoja, hasa inapotiliwa maanani kwamba huu ni mwaka wa uchaguzi ambao kila mwanasiasa anatupa karata yake kwa ajili ya kujipanga kwa uchaguzi baadaye mwaka huu, mwenendo wa mawaziri wengi kusubiri kushurutishwa ndipo wafanye kazi, kwa kweli unapaswa kubadilika.

 

Kwa wastani tangu serikali ya awamu ya nne iingie madarakani kila baada ya miaka miwili na ushei hivi imekuwa inabadilisha mawaziri. Kila wanapobadilishwa kwa hakika ni baada ya wabunge kuwa mbogo. 

 

Kila wakati wabunge wanapowakamia mawaziri ambao wamekuwa ni tatizo katika utendaji wanaungana kwa pamoja, wa chama tawala na kambi ya upinzani. Hali hii ingawa inatajwa kama moja ya mafanikio ya Bunge katika kuisimamia serikali, bado siyo siha njema ya kiutendaji kwa upande wa serikali.

 

Ni dhahiri mawaziri wanajua wajibu wao, wanajua kuwa wako serikalini na kazi yao kubwa ni kuhakikisha serikali inatekeleza majukumu yake, kila wizara kwa sehemu yake. Ni jambo la fedheha kwamba baadhi ya mawaziri wanaona fahari kuwa viti vya mstari mbele bungeni, lakini kwa kweli utendaji wao ukiwa hauakisi hata chembe hadhi na heshima waliopewa na taifa kukalia viti hivyo.

 

Uzembe huo ambao umesababisha mabadiliko ya mawaziri kila baada ya miaka miwili hivi, umesababisha hata kasi ya utendaji na usimamiaji wa shughuli za serikali ndani ya wizara kuwa ndogo. Kila waziri mpya anayeingia kwenye wizara anachukua muda kuwa na kasi ya kutenda kwa kuwa ni lazima ajifunze baadhi ya mambo. Busara ya kawaida inaelekeza kujifunza kwanza kuhusu mazingira mapya kabla ya kuanza kuleta mabadiliko chanya.

 

Ni rai yetu leo kwamba wakati sasa umefika kwa mawaziri kutambua wajibu wao na wasisubiri wabunge wawe wakali ndipo wawajibike kulingana na majukumu waliokabidhiwa na rais. 

CHANZO: NIPASHE

MISS TANZANIA MPYA LILIAN KAMAZIMA AFUNGUKA KUHUSU KUMRITHI SITTI MTEMVU!

Mkurugenzi wa Kamati ya Miss Tanzania akizungumza na waandishi wa habari wakati akitangaza kujiuzuru kwa Sitti Mtemvu aliyekua Miss Tanzania 2014 baada ya kuzuka Sintofahamu kuhusu Umri wake, Lundenga amesema Sitti Mtemvu aliandika barua ya kujivua taji na kuiwasilisha kwa kamati ya Miss Tanzania Novemba 5 2014 ambapo kamati hiyo imeridhia kujiuzulu kwake na kumvua taji.Hivyo taji hili na majukumu ya Miss Tanzania sasa yatachukuliwa na mshindi wa pili Lilian Kamazima aliyekaa kushoto katika picha ambaye taratibu za Miss Tanzania zinamruhusu kuchukua jukumu hilo, Hashim Lundenga ametangaza uamuzi huo wakati akizungumza na waandishi wa habari kwenye hoteli ya JB Belmonte jijini Dar es salaam leo.

Miss Tanzania 2014 Lilian Kamazima akizungumza na waandishi wa habari kuelezea furaha yake baada ya kamati ya Miss Tanzania kumvisha taji hilo kutokana na kujiuzuru kwa Sitti Mtemvu aliyekuwa Miss Tanzania, Kulia ni Hashim Lundega Mkurugenzi wa kamati ya Miss Tanzania.Hashim Lundega Mkurugenzi wa kamati ya Miss Tanzania akionyesha barua iliyowasilishwa kwa kamati hiyo na Bi. Sitti Mtemvu mara baada ya kujiuzulu Umiss Tanzania na kujivua taji hilo.

source: matukiotz.com

Kumfanyia vurugu Warioba ni ishara mbaya kwa demokrasia

Katuni

Demokrasia ina miiko yake. Miongoni mwa miiko hiyo inayopaswa kuheshimiwa katika jamii yoyote inayojitambulisha kuwa ni ya kidemokrasia ni pamoja na uvumilivu wa kusikiliza hoja za wengine hata kama hazifurahishi.

Kwamba, kila mtu katika jamii anapewa nafasi ya kutoa maoni yake kuhusiana na jambo fulani huku wengine wakisikiliza na kuwa na uhuru wa kukubaliana na hoja husika au kuipinga kwa hoja nyingine madhubuti. Na imethibitika katika maeneo mengi kuwa jamii inayoheshimu mwiko huu hujikuta ikifanikiwa kwa kiwango cha juu.

Watu wake huendelea kuwa huru na maamuzi mengi hufanyika kutokana na uzito wa hoja. Wala si kichume chake. 

Aidha, jamii yenye kuzingatia kigezo hiki cha demokrasia hufaidi pia matunda ya kushamiri kwa upendo. Chuki huwa ni msamiati mgumu kwa watu wa jamii hii. Matumizi ya nguvu au hila za namna yoyote ile hukosa nafasi.

Bali, watu hushindana katika kufikiri. Hoja zenye mashiko ndizo hupata uungwaji mkono zaidi. Kwa kiasi kikubwa, taifa letu limekuwa likijitahidi kufikia kiwango hiki cha demokrasia.

Watu huvumiliana katika kusikiliza na kutoa hoja. Hukubaliana katika kutofautiana kwao.Hata hivyo, kile kilichotokea juzi wakati wa kongamano la kujadili mambo ya msingi ya kuangaliwa katika katiba inayopendekezwa hakiashirii kuwapo kwa ustaarabu wa kuvumiliana miongoni mwa baadhi ya watu.

Hiyo ni baada ya aliyekuwa Mwenyekiti wa Tume ya Mabadiliko ya Katiba, Jaji Mstaafu Joseph Warioba kufanyiwa vurugu kubwa zilizosababisha kuvunjika kwa kongamano hilo lililoandaliwa na Taasisi ya Mwalimu Nyerere (MNF) na wazungumzaji wakuu wakiwa ni waliokuwa wajumbe wa Tume ya Mabadiliko ya Katiba.

Cha kusikitisha, katika kile kilichoonekana wazi kuwa bado kuna safari ndefu ya kuelekea kilele cha demokrasia, baadhi ya vijana walianza kufanya vurugu wakati Jaji Warioba alipokuwa akizungumza. Walionekana wakiwa na mabango yenye ujumbe uliokuwa na maudhui yanayofanana. Cha kushangaza, hati iliyotumika kuandikia mabango hayo ilionekana pia kufanana kwa kiasi kikubwa, kama ilivyokuwa kwa aina ya mabango yenyewe na hata wino mzito uliotumika.

Yote hayo yaliashiria kwamba vijana waliomfanyia fujo Warioba walikuwa na ajenda iliyofanana, wakitekeleza kazi waliyotumwa na mtu mmoja au kikundi fulani cha watu. 

Hakika, watu hao walionekana wazi kwamba walitumwa kwa nia ya kumziba mdomo Warioba, wakiamini kuwa hiyo ndiyo njia nzuri ya kuhakikisha kuwa maoni ya Waziri Mkuu huyo mstaafu hayawafikii  maelfu ya Watanzania waliokuwa wakifuatilia mdahalo huo kupitia matangazo ya moja kwa moja ya televisheni. 

Muda mfupi baada ya kuibuka kwa vurugu hizo, polisi walifika katika eneo la tukio na kufyatua mabomu kadhaa ya machozi. Waliotekeleza mpango huu wakahisi kuwa wamefanikiwa. Ni kwa sababu baada ya hapo hakukuwa tena na mdahalo. Vurugu zao zikafanikiwa kusitisha utoaji maoni zaidi kuhusu katiba mpya.

Sisi tunaona kuwa hili siyo jambo jema. Kamwe,  haikubaliki hata kidogo kwa kikundi fulani cha watu kufanya vurugu kwa nia ya kuzuia maoni ya wengine kusikika. 

Ikumbukwe kuwa, mbali na Warioba kutumia uhuru wake kidemokrasia katika kutoa maoni yake kuhusiana na masuala ya katiba inayopendekezwa, vilevile ana historia isiyofutika nchini. Amewahi kushika nafasi mbalimbali za juu za uongozi zikiwamo za kuwa Mwanasheria Mkuu na pia Waziri Mkuu wa Jamhuri ya Muungano wa Tanzania.

Kwa kuzingatia ukweli huo, sisi tunaona kuna kila sababu kwa Watanzania wote kulaani matukio ya aina hii. Daima demokrasia idumishwe kwa kuruhusu kila mmjoja kutoa mawazo yake, alimradi hatukani wala kuvunja sheria za nchi.

Aidha, upo umuhimu pia wa kuhakikisha kwamba viongozi wastaafu kama Warioba wanapewa ulinzi madhubuti na yeyote anayejaribu kuwafanyia vurugu anafikiwa kirahisi na mkono wa sheria. Hili ni muhimu kwani litatoa fundisho kwa wengine wenye kufikiria mipango haramu kama huu wa juzi wa kumfanyia vurugu Warioba.

Vurugu ni ishara mbaya kwa demokrasia. Kwa sababu hiyo, hazipaswi kuachwa hivi hivi. Bali, Jeshi la Polisi lifanye uchunguzi wake na kuwabaini wote waliopanga vurugu dhidi ya Warioba juzi na kisha kuwafikisha mahakamani ili wakapate wanachostahili.

 

CHANZO: NIPASHE